Kim Kardashian ka ngjallur shumë spekulime për mundësinë e blerjes së pelerinës ikonike Scorpio, që legjenda e filmit Elizabeth Taylor e veshi në vitin 1969.
Ylli 45-vjeçar u fotografua gjatë xhirimeve të serialit ‘All’s Fair’, ku luan rolin e drejtoreshës së një firme avokatie që merret me divorce, me një veshje që duket identike me pelerinën e famshme të dizajnuar nga Tiziani Roma.
Kjo pelerinë, e cila ka rreshtim mëndafshi ngjyrë fildishi, një kapuç dramatik dhe dy akrepa të qëndisur në pjesën e përparme, u vesht për herë të parë nga Elizabeth Taylor në festën e 40-vjetorit të lindjes së Grace Kelly-t.
Aktorja e kishte kombinuar atë me gjerdanin e njohur Taylor-Burton, që kishte një diamant në formë dardhe prej 69.42 karatësh.
Kim Kardashian është shfaqur gjithashtu me një gjerdan që duket si ai i aktores, duke shtuar dyshimet se mund të ketë siguruar pjesë të koleksionit të saj.
Megjithatë, ende nuk dihet nëse pelerina është origjinale, nëse Kim e ka blerë privatisht apo nëse bëhet fjalë për një kopje.
Pelerina u shit në ankandin e Christie’s në vitin 2011, si pjesë e koleksionit të Elizabeth Taylor, për 74,500 dollarë, rreth 64,000 euro.
Ndërkohë, gjerdani Taylor-Burton ishte shitur në vitin 1979 për 3.8 milionë funte, rreth 4.4 milionë euro, pasi aktorja ishte divorcuar për herë të dytë nga Richard Burton.
Kim Kardashian është shfaqur me vathët prej diamanti të Elizabeth Taylor, me vlerë 300 mijë paund, rreth 354 mijë euro, gjatë një pasarele në Paris në korrik të vitit të kaluar.
Admirimi i saj për veshjet historike të ikonave të Hollivudit është i njohur, por nëse pelerina që mban në serial është vërtet origjinalja e Elizabeth Taylor, kjo mund të hapë sërish debat për mënyrën se si trajtohen veshjet me vlerë të jashtëzakonshme historike.
