Luis Suarezi ka zbuluar rëndësinë e madhe që ka pasur Brendan Rodgers në karrierën e tij, duke pranuar se pa trajnerin britanik rrugëtimi i tij në futboll mund të ishte krejt ndryshe.
Sulmuesi uruguaian, i njohur si një nga më të mirët e shekullit XXI, shkëlqeu te Liverpooli nën drejtimin e Rodgersit, përpara se të kalonte te Barcelona, ku vazhdoi të fitojë trofe të rëndësishëm, përfshirë Ligën e Kampionëve.
Suarezi iu bashkua Liverpoolit në janar të vitit 2011, në një kohë kur klubi anglez kërkonte një zëvendësim për Fernando Torresin, i cili ishte transferuar te Chelsea.
Në atë periudhë, skuadra drejtohej nga legjenda Kenny Dalglish, por ishte Rodgersi ai që më vonë pati ndikimin më të madh në zhvillimin e sulmuesit.
Sezoni 2013/14 ishte kulmi i bashkëpunimit të tyre.
Nën drejtimin e Rodgersit, Suarezi shënoi 31 gola në 33 paraqitje në Ligën Premier, duke u shndërruar në një nga futbollistët më të kërkuar në Evropë.
Në vitin 2016, gjatë një interviste për “Liverpool Echo”, uruguaiani foli me superlativa për ish-trajnerin e tij, duke vlerësuar ndikimin që ai pati në edukimin dhe zhvillimin e tij si futbollist. “Ai është një nga trajnerët më të mirë në Evropë dhe nuk jam i befasuar që po kërkon të rikthehet në futboll, sepse është një sport që e dashuron”, kishte deklaruar Suarezi. “Një pjesë shumë e madhe e edukimit tim si futbollist i detyrohet atij dhe mënyrës se si më ka menaxhuar”, kishte shtuar sulmuesi.
Shifrat e bashkëpunimit të tyre te Liverpooli dëshmojnë ndikimin e madh të uruguaianit në skuadër.
Në 81 ndeshje nën drejtimin e Rodgersit, Suarezi realizoi 61 gola dhe regjistroi 23 asistime. “Pa Brendan, nuk e di nëse do ta kisha pasur këtë karrierë.” Vlerësimi i Suarezit për Rodgersin nuk u ndal me deklaratat e vitit 2016.
Në një intervistë për “Daily Record” në vitin 2023, ai pranoi se ish-trajneri i Liverpoolit kishte luajtur rol vendimtar në rrugëtimin e tij profesional. “Nëse nuk do të ishte Brendani, nuk jam i sigurt nëse do ta kisha pasur karrierën që pata.
Ai investoi shumë tek unë”, ishte shprehur Suarezi.
Uruguaiani vlerësoi gjithashtu aftësinë e Rodgersit për të punuar individualisht me lojtarët, duke shpjeguar se trajneri i ndihmonte ata të identifikonin pikat e forta dhe dobësitë, si dhe të përmirësonin aspektet e lojës së tyre.
Sipas Suarezit, Rodgersi nuk përqendrohej vetëm te loja e skuadrës dhe futbolli ofensiv, por i kushtonte rëndësi të veçantë zhvillimit individual të secilit futbollist.
Pas largimit nga Liverpooli në vitin 2015, Rodgersi drejtoi Celticun dhe Leicester Cityn, përpara se të rikthehej te klubi skocez për një periudhë të dytë.
Në momentin e fundit, ai ishte trajner i Al Qadsiahut në Arabinë Saudite.
