Ministri i Punëve të Jashtme dhe të Diasporës, Glauk Konjufca, ka zhvilluar një takim me ministrin e Punëve të Jashtme të Zvicrës, Ignazio Cassis, ku u diskutua për marrëdhëniet mes dy vendeve dhe mundësitë për thellimin e bashkëpunimit bilateral.
Në një konferencë të përbashkët, Konjufca e cilësoi takimin si të rëndësishëm dhe produktiv, duke vlerësuar mbështetjen e vazhdueshme të Zvicrës për Kosovën që nga njohja e pavarësisë. “Zvicra ka qenë nga fillimi partnere e palëkundur e Kosovës që nga njohja e pavarësisë sonë.
Ka mbështetur zhvillimin tonë dhe angazhimin ndërkombëtar.
E çmojmë thellësisht këtë miqësi,” tha Konjufca.
Ai gjithashtu theksoi rëndësinë e mërgatës shqiptare në Zvicër, duke e cilësuar atë si një pjesë të pandashme të historisë së Kosovës dhe një lidhje të veçantë ndërmjet dy shteteve. “Sot mërgata e Kosovës në Zvicër është shumë më tepër se një urë lidhëse mes dy vendeve tona, është pjesë e pandashme e historisë sonë,” theksoi ai, duke shprehur mirënjohje për mikpritjen dhe mbështetjen që Zvicra u ka ofruar bashkatdhetarëve ndër vite.
Në kuadër të bashkëpunimit ekonomik, Konjufca vlerësoi programin zviceran të bashkëpunimit për periudhën 2026-2029, si dhe hyrjen në fuqi të marrëveshjes së tregtisë së lirë me vendet e EFTA-s, ku bën pjesë edhe Zvicra.
Sipas tij, kjo marrëveshje krijon mundësi të reja për bizneset dhe zhvillimin e bashkëpunimit ekonomik, të cilat Kosova synon t’i shfrytëzojë në interes të të dy popujve.
Konjufca gjithashtu vlerësoi mbështetjen e Zvicrës për rrugën evropiane të Kosovës, përfshirë përkrahjen për anëtarësimin në Këshillin e Evropës.
