Ministri i Punëve të Jashtme dhe Tregtisë së Jashtme, Timço Mucunski, ka folur për raportin e fundit të Komisionit Evropian dhe sfidat e integrimit evropian gjatë një paraqitjeje në televizionin Sitel.
Ai vlerësoi se raporti ofron një pasqyrë objektive të situatës në vend, duke theksuar se ka përparim në disa fusha, por ende kërkohet punë në të tjera. “Unë nuk do t’i quaja kritika, por udhëzime për atë që duhet të bëjmë për t’u përmirësuar.
Përmbajtja e këtij raporti është në interesin tonë.
Nuk duhet ta shohim si detyrim ndaj Bashkimit Evropian, por si detyrim ndaj qytetarëve tanë, sepse bëhet fjalë për standarde të larta, në të cilat prej vitesh investojmë kohë dhe burime serioze”, tha ai.
Mucunski gjithashtu theksoi se vendi ka marrë vlerësime të larta në fushën e politikës së jashtme dhe sigurisë, duke u fokusuar në aktivitetet ndërkombëtare dhe përcaktimin strategjik të shtetit.
Kur u diskutua për fushat ku nevojitet përparim, ai e theksoi se reforma në gjyqësor dhe lufta kundër korrupsionit nuk varen vetëm nga pushteti ekzekutiv. “Çështja nuk është vetëm se cilat ligje do të miratojmë si Qeveri, por edhe se si do të zbatohen ato dhe çfarë rezultatesh konkrete do të japin institucionet, veçanërisht sistemi gjyqësor në luftën kundër korrupsionit të nivelit të lartë”, theksoi ai.
Në lidhje me politikën e zgjerimit, ministri Mucunski përmendi mekanizmat e rinj për integrim gradual dhe qasjen e bazuar në merita, duke theksuar nevojën për angazhim dhe rezultate të përbashkëta. “Edhe ne duhet të përfshihemi aktivisht, t’i zbatojmë reformat dhe të sigurojmë një kornizë të parashikueshme dhe të sigurt për rrugën tonë drejt integrimit evropian”, përfundoi ai.
Ai gjithashtu theksoi rëndësinë e njohjes së mbështetjes shoqërore për integrimin evropian dhe nevojën për mirëkuptim të ndërsjellë mes vendeve anëtare. “Reformat e brendshme dhe zgjidhja e çështjeve politike duhet të ecin paralelisht”, përfundoi Mucunski.
