Ministri i Punëve të Brendshme, Xhelal Sveçla, gjatë ceremonisë së diplomimit të gjeneratës së 63-të të Policisë së Kosovës, theksoi se ky profesion kërkon përkushtim, disiplinë, guxim dhe gatishmëri për të marrë përgjegjësi në situata sfiduese.
Ai e vlerësoi rolin e Policisë së Kosovës si të pazëvendësueshëm në ndërtimin e një vendi më të sigurt, ku ligji zbatohet për të gjithë, duke rikujtuar se uniforma është simbol i përgjegjësisë ndaj qytetarëve.
Në fjalimin e tij, Sveçla theksoi se siguria dhe rendi janë ndër simbolet e qetësisë dhe besimit të qytetarëve, si dhe të përpjekjeve për të ndërtuar një shoqëri ku ligji vlen për të gjithë. “Siguria dhe rendi.
Ajo është një nga simbolet e qetësisë sonë, e besimit të qytetarëve dhe përpjekjes sonë për të ndërtuar një vend ku ligji vlen për të gjithë dhe ku secili qytetar ndihet i sigurt dhe i mbrojtur,” tha ai.
Ai theksoi se për ndërtimin e një vendi më të drejtë dhe më të sigurt, duhet të punohet vazhdimisht, në mënyrë që liria, barazia dhe drejtësia të mos mbeten vetëm parime, por të bëhen pjesë e jetës së përditshme të qytetarëve.
Sveçla e vlerësoi Policinë e Kosovës si një aktor të rëndësishëm në këtë proces.
Diplomimi i gjeneratës së 63-të është një moment i rëndësishëm jo vetëm për kadetët që përfunduan përgatitjen, por edhe për Policinë e Kosovës dhe vendin, që tani i bashkohet një gjeneratë e re e gatshme për të marrë përgjegjësinë e shërbimit ndaj qytetarëve.
Duke iu drejtuar kadetëve të diplomuar, ai theksoi se përfundimi i kësaj faze përbën fillimin e një rrugëtimi të ri në shërbim të Republikës së Kosovës dhe qytetarëve të saj.
Ministri u kujtoi atyre se profesioni i policit kërkon përkushtim të vazhdueshëm, disiplinë, guxim dhe gatishmëri për të marrë përgjegjësi edhe në situatat më sfiduese. “Dua t’ju rikujtoj se uniforma që do të mbartni nuk është simbol i pushtetit mbi qytetarët, por i përgjegjësisë ndaj tyre,” përfundoi Sveçla.
