Forumi për Ndryshime në Arsim ka vendosur të padit Ministrinë e Arsimit dhe Shkencës për mos rritjen e shujtës studentore.
Kryetari Blendi Hodai, para se të depozitonte padinë në Gjykatën Administrative, theksoi se çështja e shujtës studentore nuk është nëse Qeveria dhe Ministria kanë vullnet për ta rritur, por është një detyrim ligjor.
Sipas nenit 2 pika 1 të ligjit, shujta studentore duhet të harmonizohet çdo vit me përqindjen e inflacionit vjetor të vendit. “Ministria e Arsimit dhe Shkencës në rastin tonë ka shkelur ligjin dhe ka dëmtuar rreth 3,000 studentë që përfitojnë nga shujta.
Një student sot merr 25 denarë më pak për ushqim, për shkak të mosharmonizimit të shujtës.
Kjo sjell një humbje prej rreth 650 denarësh në muaj, ose 6,000 denarë për një vit akademik”, deklaroi Hodai.
Në lidhje me ndryshimin e modelit të shujtës studentore, ai shprehu se nuk e pranojnë këtë propozim, pasi procedura mund të zgjasë 7-8 muaj dhe studentët mund të përfundojnë vitin akademik me shumën aktuale. “A pajtohemi që shujta studentore duhet të përdoret vetëm për ushqim të shëndetshëm?
Po.
Ne kemi qenë për këtë propozim që në vitin 2020, por forma nuk duhet të ndryshohet.
Kryeministri thotë se duhet krijuar një procedurë tenderimi, që do të marrë kohë 7-8 muaj”, shtoi ai.
Forumi për Ndryshime në Arsim gjithashtu kërkon që studentët që përfitojnë nga shujta të paguhen retroaktivisht për dëmin financiar që u është shkaktuar nga MASH.
Ata nënvizojnë se në Kosovë, 38% e të rinjve përballen me varfëri.
