Ministra, drejtorë, zyrtarë dhe përfaqësues të kishës janë ndër ata që kanë marrë gjoba nga sistemi i kamerave “Safe City”.
Ministri i Punëve të Brendshme, Pançe Toshkovski, theksoi se të gjitha gjobat janë paguar, pavarësisht se shkeljet janë kryer me automjete zyrtare ose private.
Duke folur për rezultatet e këtij sistemi, Toshkovski nënvizoi se kamerat nuk bëjnë dallime mes qytetarëve dhe bartësve të funksioneve publike.
Ai shtoi se gjatë një viti e gjysmë të fundit, nuk ka pasur përpjekje për ndërhyrje në raste të veçanta të kundërvajtjeve në trafik.
Sipas ministrit, zbatimi i “Safe City” ka sjellë rezultate pozitive edhe në sigurinë rrugore, duke kontribuar në uljen e numrit të viktimave në aksidente trafiku me 30 për qind.
