Kryetarja e Kuvendit të Kosovës, Albulena Haxhiu, ka shprehur shqetësimin e saj lidhur me interpretimin e këngës nacionaliste serbe “Oj Kosova, Kosova” gjatë një aktiviteti të organizuar para Forumit të Zgjerimit të Bashkimit Evropian në Bruksel.
Në një postim në Facebook, Haxhiu e ka cilësuar këtë interpretim si shqetësues, duke theksuar se ajo promovon pretendime territoriale ndaj Republikës së Kosovës.
Ajo ka theksuar se një aktivitet që ka për qëllim afrimin e vendeve të rajonit me Bashkimin Evropian nuk duhet të përcjellë mesazhe që bien ndesh me parimet e paqes, fqinjësisë së mirë dhe respektimin e sovranitetit të shteteve. “Është thellësisht shqetësuese që në hapjen e Forumit të Zgjerimit të Bashkimit Evropian në Bruksel të interpretohet muzika e një kënge nacionaliste serbe që promovon pretendime territoriale ndaj Republikës së Kosovës,” ka shkruar Haxhiu.
Ajo ka kërkuar gjithashtu sqarim nga Komisioni Evropian për përzgjedhjen e kësaj kënge, duke e cilësuar atë si të papërgjegjshme.