Komisioni Shtetëror i Zgjedhjeve mbajti seancën e 19-të, ku u miratua unanimisht përmbajtja, pamja dhe siguria e fletëvotimit për Zgjedhjet e Parakohshme për Kryetar të Komunës së Bërvenicës, të cilat do të zhvillohen më 18 tetor 2026.
Në përputhje me nenin 33 të Rregullores së Punës dhe dispozitat përkatëse të Kodit Zgjedhor, kjo çështje u diskutua në një seancë të mbyllur, pa praninë e publikut, për të ruajtur konfidencialitetin e materialit zgjedhor dhe për të mbrojtur integritetin e procesit zgjedhor.
Gjatë këtij procesi, u përcaktuan elementët specifikë të sigurisë të dukshëm dhe të padukshëm të fletëvotimit. “Gjatë përcaktimit të përmbajtjes së fletëvotimit, u zbatuan plotësisht normat ligjore, sipas të cilave materiali shtypet në gjuhën maqedonase dhe shkrimin e saj çirilik, si dhe në përputhje me përfaqësimin e bashkësive në Komunën e Bërvenicës, dhe në gjuhën dhe shkrimin zyrtar që përdorin të paktën 20% e qytetarëve në atë komunë, si dhe gjuhën dhe shkrimin e bashkësisë së cilës i përkasin kandidatët.
Renditja e kandidatëve dhe paraqitësve të tyre është sipas listës së vetme të përcaktuar të kandidatëve, dhe pjesa kryesore e fletëvotimit përmban emrin e komunës, numrin e qendrës së votimit, emrin dhe simbolin e paraqitësit, si dhe numrin rendor, emrin dhe mbiemrin e kandidatëve.
Pjesa që mbetet në fletëvotim përmban numrin serik, komunën dhe numrin e qendrës së votimit.
Për pjesën e mbyllur të seancës do të hartohet një procesverbal i veçantë, i cili do të arkivohet në mënyrë të përshtatshme së bashku me regjistrimin audio dhe nuk do të bëhet publik.
Në kuadër të rendit të ditës të miratuar, Komisioni Shtetëror i Zgjedhjeve miratoi unanimisht edhe procesverbalin e seancës së 18-të të mëparshme”, njoftojnë nga KSHZ-ja.
