Këngëtarja e njohur shqiptare, Xhensila Myrtezaj, ka ndarë një mesazh të ndjerë me ndjekësit e saj në Instagram, në të cilin shpreh shqetësimin për gjendjen në vend dhe sfidat me të cilat përballen qytetarët. “Më dhemb ajo që shoh në vendin tim”, shkruan Xhensila në fillim të reagimit të saj, duke u fokusuar te të rinjtë që detyrohen të largohen nga Shqipëria në kërkim të një të ardhmeje më të mirë.
Ajo thekson se e shqetëson fakti që të rinjtë po braktisin ëndrrat e tyre, duke u përballur me pasigurinë, zhgënjimin dhe frikën se nesër nuk do të kenë një të ardhme në vendin ku kanë lindur.
Këngëtarja gjithashtu vëren sakrificat e prindërve, të cilët punojnë pa u lodhur për fëmijët e tyre, si dhe vështirësitë që përballen ata që punojnë ndershmërisht dhe mezi arrijnë të jetojnë me dinjitet. “Unë jam artiste.
Jam nënë.
Por mbi të gjitha, jam qytetare e këtij vendi”, shprehet ajo, duke theksuar se nuk dëshiron që fëmijët e saj të detyrohen të largohen nga Shqipëria për të pasur mundësitë që duhet t’i kishin në vendin e tyre.
Në fund të mesazhit, Xhensila thekson se një vend nuk është vetëm toka ku lindim, por edhe shpresa që na jep për të qëndruar.
Ajo kërkon që zëri i qytetarëve dhe studentëve të dëgjohet, e jo të shuhet, duke përmbyllur reagimin me fjalë të ndjera për vendin e saj: “Me zemër, me dhimbje dhe me shpresë për Shqipërinë tonë.”
