Autoritetet e qytetit në Ohër kanë vendosur që nga 1 janari të fillojnë t’u dërgojnë banorëve fatura të ujit me një rritje prej 8%.
Shumica në këshillin komunal miratoi sot një vendim sipas të cilit, deri në vitin 2029, faturat do të rriten deri në 16 përqind.
Kjo rritje do të prekë seriozisht jo vetëm qytetarët, por edhe kompanitë lokale, strukturat turistike dhe hotelet, të cilat do të përballen me një rritje prej 20 përqind në faturat e tyre. “Shumica qeverisëse e udhëhequr nga Vmro Dpmne, ka rritur ndjeshëm çmimet e shërbimeve të Ujësjellësit.
Personat juridikë do të paguajnë 20 përqind më shumë në tre vitet e ardhshme.
Kjo është një goditje e drejtpërdrejtë për xhepat e banorëve të Ohrit, dhe ne pyesim veten se çfarë fitojnë banorët nga këto rritje.
Kjo është një dëshmi se kjo qeverisje lokale punon vetëm për të mirat e ndërmarrjeve publike, ndërsa banorët nuk marrin asnjë përfitim në cilësinë e shërbimeve”, tha Lidija Nedanoska, këshilltare e LSDM-së.
Analiza e faturave të ujit tregon se në vitin 2020, faturat ishin rreth 400 denarë, në vitin 2023 480 denarë, në vitin 2026 550 denarë, dhe në vitin 2027 pritet të arrijnë rreth 620 denarë.
Po ashtu, në vitin 2018, me një pagë minimale prej 12.165 denarësh, qytetarët mund të blinin 476 metra kub ujë.
Ndërsa në vitin 2025, me një pagë minimale prej 24.379 denarësh, mund të bliheshin 659 metra kub ujë. “Ndërmarrja Publike Ujësjellësi dhe Kanalizime beson se rritjet janë minimale dhe të justifikuara, duke u miratuar si rezultat i një vendimi të mëparshëm nga Komisioni Rregullator për Shërbimet e Energjisë dhe Ujit.
Kjo rritje çmimi është minimale, d.m.th. rreth 4 denarë në vitin e parë, që për një familje mesatare do të thotë rreth 30-40 denarë shpenzime shtesë”, tha Marjan Risteski, Drejtor i Ndërmarrjes Publike Ujësjellësi dhe Kanalizimi Ohër.
Kjo rritje do të sjellë gjithashtu një rritje të faturave për Ndërmarrjen Publike “Niskogradba”, e cila merret me mbledhjen dhe largimin e ujërave fekale dhe të zeza.
Nga “Niskogradba” thonë se për një familje me katër anëtarë, rritja do të jetë vetëm rreth 3 denarë në muaj.
