Të rinjtë në zonat rurale të Shqipërisë janë mobilizuar për të adresuar problemet mjedisore që prekin komunitetet e tyre.
Ata po shfrytëzojnë rrjetet sociale dhe platformat digjitale për të kërkuar zgjidhje nga institucionet.
Një nismë e tillë në bashkinë e Maliqit, në qarkun e Korçës, ka arritur të mbledhë 506 nënshkrime në një peticion që kërkon pastrimin e lumit Devoll dhe përmirësimin e menaxhimit të mbeturinave.
Ndryshimi i klimës dhe grumbullimi i mbeturinave përgjatë brigjeve janë disa nga shqetësimet kryesore të banorëve të zonës.
Ky problem u bë veçanërisht i dukshëm pas përmbytjeve të nëntorit 2025, kur reshjet e dendura dhe mbeturinat ndikuan në bllokimin e kanaleve të kullimit dhe përhapjen e ujërave në tokat bujqësore dhe zonat e banuara.
Nisma është mbështetur nga organizata joqeveritare Qendra KAZUS, e cila gjatë vitit 2026 ka trajnuar 44 të rinj nga bashkia e Maliqit në përdorimin e mjeteve digjitale për dokumentimin e problemeve mjedisore dhe për ndërgjegjësimin e publikut.
