Sot, Zyra e Avokatit të Popullit do të ketë një ekip në detyrë gjatë raundit të dytë të zgjedhjeve të parakohshme për kryetar të Komunës së Bërvenicës, për të pranuar ankesa nga qytetarët lidhur me shkeljet e mundshme të së drejtës së votës.
Avokati i Popullit njofton se zyra rajonale në Tetovë do të qëndrojë e hapur nga ora 7:00 deri në 19:00, gjatë gjithë periudhës së votimit, për t’i mundësuar qytetarëve të raportojnë çdo shkelje të së drejtës së votës.
Raportet mund të dorëzohen personalisht në zyrë ose duke telefonuar në numrin 044/344-082.
Avokati i Popullit thekson se do të angazhohet për mbrojtjen e të drejtave të qytetarëve duke ndërmarrë masa urgjente për veprime efektive nga autoritetet përgjegjëse në procesin zgjedhor dhe nga institucionet e tjera që kanë për detyrë mbrojtjen e të drejtave të garantuara.
Njoftimi i tij rikujton se e drejta e votës është e garantuar nga kushtetuta si një e drejtë e barabartë, e përgjithshme dhe e drejtpërdrejtë që ushtrohet në zgjedhje të lira me votim të fshehtë.
Ai thekson se askush nuk duhet të mbahet përgjegjës për ushtrimin e së drejtës së tij të votës, duke rikujtuar se shkeljet e lirisë së zgjedhjes së votuesve dhe shkeljet e tjera të të drejtave të votimit janë vepra të dënueshme.
