Një nga institucionet që Arlinda Zekaj kishte kritikuar gjatë jetës së saj ishte Qendra për Punë Sociale në Pejë.
Ministria e Punës dhe Familjes po pret raportin përfundimtar për veprimet e këtij institucioni.
Nëse konstatohet ndonjë shkelje, do t’i rekomandojë kryetarit të Pejës masa për zyrtarët përgjegjës.
Kjo nuk është hera e parë që dalin raporte për raste të rënda që përfshijnë Qendrat për Punë Sociale, por informacionet mbi zbatimin e masave të rekomanduara mbeten të paqarta.
Dy ministri tashmë kanë publikuar raporte që zbulojnë dështimet institucionale që çuan në tragjedinë e Arlinda Zekajt.
Pas raportit nga Ministria e Drejtësisë dhe Ministria e Punëve të Brendshme, tani Ministria për Punë dhe Familje po pret një raport që shqyrton veprimet e Qendrës për Punë Sociale në Pejë.
Ministri Andin Hoti ka deklaruar se raporti do të përfundojë brenda pak ditësh dhe se po shqyrtohet edhe roli i Qendrës në Gjilan, pas incidentit tragjik që rezultoi me vdekjen e dy personave, përfshirë një foshnjë.
Ai theksoi: “Ditën që ka ndodhur rasti, divizioni i inspektimit ka shkuar në Pejë, ka marrë të gjithë dosjen dhe ka intervistuar zyrtarët e qendrës për punë sociale dhe në Gjilan për rastin e fatkeqësisë së foshnjës.
Raporti ende nuk ka përfunduar dhe nuk mund të jap më shumë detaje pa e përfunduar atë.” Në lidhje me masat që do të merren nga gjetjet eventuale, ministri Hoti tha se vendimi do të mbetet në duar të organeve lokale, konkretisht kryetarit të Komunës. “Divizioni i inspektimit e ka për detyrë të shqyrtojë nëse po implementohen politikat në kuadër të qendrave për punë sociale.
Masat që mund të marrim nuk janë të mëdha, pasi ne raportin përfundimtar e dërgojmë te kryetari i komunës së Pejës, duke kërkuar nga ai të ndërmarrë masa disiplinore ndaj zyrtarëve të QPS-së,” tha ai.
Qendrat për punë sociale në Kosovë vazhdojnë të përballen me shumë probleme, përfshirë mungesën e stafit dhe kushteve të papërshtatshme.
Kontakti me këto qendra është shpesh i vështirë.
Yll Bokshi, avokat në Gjakovë, përmes iniciativës personale ka krijuar një ueb-faqe që ofron numrat kontaktues dhe informacione të tjera për këto qendra.
Bokshi thekson nevojën për reformimin e Qendrave, duke theksuar rëndësinë e tyre. “Duhet të kemi një ndryshim në bazën ligjore dhe të ristrukturohet i gjithë procesi.
Puna sociale në Kosovë ka nevojë për një qasje më të integruar, në vend që të presim që të ndodhin tragjedi për të reflektuar,” theksoi ai.
Ministria e Punës dhe Familjes gjithashtu ka përpiluar një raport për Qendrën për Punë Sociale në Lipjan, pas rastit të keqtrajtimit të një 5 vjeçari.
Sipas ministrit Hoti, vetëm një zyrtar është suspenduar, ndërsa Komuna nuk ka dhënë informacione të tjera mbi masat e rekomanduara.
Ngjashëm, nga kjo komunë janë kërkuar informacione edhe për masat e rekomanduara dhe zbatimin e tyre pas rasteve të rënda.
