Kryeministri i Kosovës, Albin Kurti, në një intervistë për gazetën prestigjioze franceze “Le Monde”, theksoi se Kosova ka për qëllim integrimin në Bashkimin Evropian përmes meritave dhe reformave, jo përmes ndonjë rruge të privilegjuar.
Gjatë vizitës së tij treditore në Paris, Kurti u takua me presidentin francez, Emmanuel Macron, ku diskutuan për integrimin evropian të Kosovës, mbështetje për zhvillimin e vendit dhe projekte të rëndësishme infrastrukturore e energjetike. “Pranimi në BE bazuar në meritë, jo përmes një dere të pasme”, ishte mesazhi i Kurtit, siç theksohet në titullin e intervistës.
Në intervistën e dhënë më 10 nëntor, Kryeministri gjithashtu diskutoi për situatën e sigurisë në Evropë dhe ndikimin e zhvillimeve gjeopolitike në Kosovë. “Agresioni rus kundër Ukrainës tregon se historia po kthehet në skenën botërore me më shumë forcë se kurrë më parë në këtë shekull”, u shpreh Kurti në fillim të bisedës.
Ai theksoi se Kosova ndodhet në një kontekst të ndjeshëm gjeopolitik, ku Serbia vazhdon të mos e njohë pavarësinë e saj, duke e konsideruar Kosovën si pjesë të territorit të vet.
Kryeministri kërkoi gjithashtu mbështetje nga Franca për projektet infrastrukturore dhe energjetike, me qëllim që vendi të forcojë qëndrueshmërinë dhe sigurinë e tij në një periudhë të pasigurt ndërkombëtare.
Një nga çështjet e diskutuara gjatë vizitës në Paris ishte organizimi i Lojërave Mesdhetare të vitit 2030 në Prishtinë.
Për këtë projekt, Kosova ka siguruar një kredi prej 60 milionë eurosh nga Agjencia Franceze për Zhvillim (AFD), e cila do të përdoret për hartimin e fshatit ndërkombëtar të atletëve.
Gazeta franceze gjithashtu trajtoi mosmarrëveshjet mes Kosovës dhe Serbisë, duke përmendur si një prej pikave të tensionit çështjen e autonomisë së serbëve të Kosovës, të cilët përbëjnë rreth gjashtë për qind të popullsisë.
Intervista e Kurtit për “Le Monde” vjen në kuadër të përpjekjeve të Kosovës për të siguruar mbështetje më të madhe nga partnerët evropianë dhe për të avancuar rrugën e saj drejt integrimit euroatlantik.
