Propozimi për vendosjen e një page minimale prej 5 mijë frangash në muaj për të gjithë ata që kanë përfunduar një shkollim profesional në Zvicër, i bërë publik një ditë më parë nga sindikatat zvicerane, ka shkaktuar reagime të forta nga përfaqësuesit e punëdhënësve.
Pas kërkesës së Unionit të Sindikatave Zvicerane (USS), të drejtuar nga Pierre-Yves Maillard, që punëtorët me diplomë profesionale të përfitojnë së paku 5 mijë franga në muaj, organizatat ekonomike kanë dalë kundër këtij propozimi.
Ato kanë paralajmëruar pasoja të mundshme për tregun e punës dhe sistemin e arsimit profesional.
Sipas raportimit të mediumit zviceran Blick, presidenti i Unionit Zviceran të Ndërmarrjeve të Vogla dhe të Mesme (USAM), Fabio Regazzi, ka kritikuar kërkesën e sindikatave, duke thënë se rregullimet shtesë mund ta bëjnë më të kushtueshëm arsimin profesional dhe t’i shtyjnë kompanitë të ofrojnë më pak vende për praktikantë.
