Katër shtetas turq janë arrestuar në Prizren nën dyshimin për veprat penale “Shtrëngim”, “Privim i kundërligjshëm nga liria” dhe “Lëndim i lehtë trupor”.
Sipas raportit 24-orësh të Policisë së Kosovës, dy të dyshuarit fillimisht kishin sulmuar fizikisht një person tjetër, gjithashtu shtetas turk.
Pas këtij sulmi, ata e kishin futur atë në një veturë dhe e kishin mbajtur për 12 orë kundër vullnetit të tij në një shtëpi private.
Ngjarja kishte ndodhur më 1 nëntor, në rrugën “Ekrem Rexha” në Prizren, ndërsa katër të dyshuarit janë arrestuar më 9 nëntor, pas hetimeve të zhvilluara nga institucionet përkatëse.
