Mbetjet mortore të së paku një personi janë zbuluar dhe zhvarrosur në fshatin Brod të Komunës së Shtërpcës.
Ato janë dërguar në Institutin e Mjekësisë Ligjore për t’u nënshtruar ekzaminimeve dhe analizave të ADN-së, me qëllim identifikimin e mundshëm.
Kushtrim Gara nga Komisioni Qeveritar për Persona të Zhdukur ka njoftuar se kërkimet në këtë lokacion janë zhvilluar bazuar në informacionet e marra nga familjarët e personave të zhdukur dhe qytetarët.
Gara përmendi se gërmimet e para nisën më 6 nëntor, por për shkak të kushteve të terrenit dhe ndryshimeve në infrastrukturë, nuk arriti të gjente mbetje mortore atë ditë. “Jemi rikthyer sërish sot dhe, pas angazhimit të të gjitha ekipeve, është arritur të gjenden dhe zhvarrosen mbetjet mortore, që sipas ekspertëve të Institutit për Mjekësi Ligjore, i përkasin minimumi një personi”, deklaroi Gara.
Ai theksoi se mbetjet janë dërguar në Institutin e Mjekësisë Ligjore për ekzaminime dhe marrjen e mostrave për analiza të ADN-së, të cilat do të krahasohen me mostrat referente të familjarëve.
Gara gjithashtu njoftoi se gjatë vitit 2026 janë trajtuar rreth 20 deri në 21 lokacione, ndërsa veçoi gjetjet në Jabuk dhe Kalludër të Zubin Potokut si disa nga rastet më të rëndësishme.
Ai paralajmëroi se kërkimet do të vazhdojnë në disa lokacione të tjera, përfshirë një fshat në Komunën e Pejës, varrezat në veri të Mitrovicës, Miradinë e Fushë-Kosovës dhe varrezat e qytetit të Prishtinës në lagjen Arbëria.
Ndërkaq, Gara përmendi mungesën e qasjes në arkivat e Serbisë si pengesën kryesore në procesin e kërkimit të personave të zhdukur. “Pengesa më e madhe mbetet mungesa e informacioneve që do të duhej të vinin nga arkivat e institucioneve të Serbisë, po flas për arkivat e ish-ushtrisë jugosllave dhe arkivat e policisë serbe”, theksoi ai.
Sipas Garës, vështirësi paraqet edhe qasja në lokacionet e dyshuara për varreza masive në territorin e Serbisë, ku ende nuk ka përfunduar procesi i kërkimeve.
