Shefi i Grupit Parlamentar të Aleancës, Besnik Tahiri, ka shprehur kritika të forta ndaj Qeverisë lidhur me mungesën e progresit në procesin e integrimit evropian, menaxhimin e parasë publike dhe politizimin e administratës.
Pas debatit për Raportin e Progresit, Tahiri theksoi se Kosova ka mbetur pa një agjendë të qartë për integrimin evropian dhe se është vendi me progresin më të dobët në Ballkanin Perëndimor. “Kosova ende nuk e ka statusin e vendit kandidat dhe ka humbur dy vjet e nëntë muaj nën masat e Bashkimit Evropian,” theksoi ai.
Ai kritikoi gjithashtu mungesën e një ministri ose zëvendëskryeministri të angazhuar për integrimin evropian, duke e parë këtë proces si jo prioritet të Qeverisë.
Një nga çështjet e ngritura ishte shpërndarja e 100 eurove, vetëm 16 ditë para zgjedhjeve, të cilën ai e konsideroi si një shqetësim serioz për përdorimin e resurseve publike në mënyrë elektorale.
Tahiri gjithashtu adresoi problemet me politizimin e administratës publike dhe menaxhimin e dobët të parasë publike, duke theksuar se zbatimi i rekomandimeve të Zyrës Kombëtare të Auditimit ka rënë nga 50 për qind në vitin 2021 në vetëm 36 për qind.
Një shqetësim tjetër i tij ishte rreziku i humbjes së 131 milionë eurove nga Plani i Rritjes, pas humbjes së 43.8 milionë eurove deri tani.
Përballë kësaj situate, ai kërkoi nga Qeveria tri veprime urgjente: emërimin e një ministri apo zëvendëskryeministri me përgjegjësi për integrimin evropian, avancimin e procesit të anëtarësimit drejt statusit të vendit kandidat dhe marrjen e masave për të mos humbur 131 milionë eurot e tjera. “Integrimi evropian nuk bëhet me deklarata, por me institucione funksionale, reforma konkrete, përgjegjësi dhe rezultate,” përfundoi Tahiri.
