Lionel Messi duket se ka gjetur mënyrën ideale për të shkuar drejt një kapitulli të ri në jetën e tij.
Pas lamtumirës emocionale nga kombëtarja e Argjentinës, ylli i futbollit ka porositur një jaht luksoz me vlerë që arrin deri në 10 milionë euro.
Bëhet fjalë për modelin ULTIMA 88, një katamaran i prodhuar nga kompania polake Sunreef Yachts, i projektuar për të ofruar komoditet dhe luks në det të hapur.
Sipas raportimeve, çmimi i këtij modeli varion nga 8 deri në 10 milionë euro, por shuma përfundimtare që do të paguajë Messi nuk është bërë publike.
Me një gjatësi prej rreth 28 metrash, kjo nuk është thjesht një varkë për pushime, por një mjet lundrues që kombinon teknologjinë moderne me hapësirat e një rezidence luksoze.
Katamarani pritet t’i shtohet flotës së lidhur me aktivitetet e Messit në sektorin e turizmit dhe mikpritjes.
Kjo porosi vjen pas një momenti të rëndësishëm në karrierën e argjentinasit, i cili i dha fund aventurës së tij me përfaqësuesen pas një rrugëtimi të jashtëzakonshëm.
Lamtumira e tij u shoqërua me emocione të forta, ndërsa Messi largohet nga kombëtarja si një prej figurave më të mëdha në historinë e futbollit.
Megjithatë, jashtë fushës, ylli argjentinas vazhdon të ndërtojë projekte të reja.
Përveç karrierës sportive, ai është i angazhuar edhe në sektorin e hotelerisë përmes markës MIM Hotels, ndërsa jahti i ri lidhet me flotën MIM Ocean, të orientuar drejt përvojave luksoze në det.
Kështu, ndërsa kapitulli me Argjentinën mbyllet, Messi po përgatit një tjetër aventurë, këtë herë larg stadiumeve dhe në ujërat e Mesdheut.
