Ish-i dërguari special i Shteteve të Bashkuara të Amerikës për Ballkanin Perëndimor, Matthew Palmer, vlerëson se zhvillimet politike në Serbi mund të kenë një ndikim të rëndësishëm në të ardhmen e rajonit, përfshirë pozitën e liderit të Republikës Srpska, Milorad Dodik.
Në një intervistë për televizionin N1, ai diskutoi ndikimin e zgjedhjeve të mesit të mandatit në SHBA mbi politikën e jashtme amerikane, duke theksuar se ndryshimet politike në Serbi mund të krijojnë mundësi të reja për proceset e integrimit evropian dhe euroatlantik.
Duke folur për situatën në Bosnjë dhe Hercegovinë dhe ndikimin e mundshëm në pozitën e Dodikut, Palmer shprehu se zhvillimet në Serbi mund të kenë më shumë ndikim sesa rezultatet e zgjedhjeve amerikane. “Pres që zgjedhjet në Serbi do të kenë një ndikim më të madh në pozicionin dhe forcën e Dodikut, jo vetëm në rajon, por edhe në Uashington.
Shenjat e asaj që mund të ndodhë në Bosnjë dhe Hercegovinë duhen kërkuar në rajon”, deklaroi ai.
Ish-diplomati amerikan foli gjithashtu për rëndësinë e marrëdhënieve ndërmjet Kosovës dhe Serbisë, duke vënë në pah se normalizimi i tyre mbetet një çështje e rëndësishme për perspektivën evropiane të Ballkanit Perëndimor.
Ai vlerësoi se një shumicë e mundshme e demokratëve në Kongresin amerikan mund të sjellë mbështetje më të fuqishme për vendet e rajonit në rrugën drejt integrimit evropian.
Në këtë kontekst, Palmer veçoi Kosovën dhe Maqedoninë e Veriut, duke theksuar rëndësinë e avancimit të integrimit të tyre evropian.
Ai përmendi edhe kongresistët amerikanë Gregory Meeks dhe Chris Coons, duke i cilësuar ata si mbështetës të Ballkanit Perëndimor.
Duke komentuar zhvillimet politike në SHBA, Palmer shprehu se rezultatet e zgjedhjeve të mesit të mandatit do të kenë ndikim në marrëdhëniet ndërmjet presidentit dhe Kongresit, si dhe në orientimin e politikës së jashtme amerikane.
Sa i përket rezultateve zgjedhore, ai vlerësoi se demokratët kanë shënuar rezultat të mirë, por theksoi se vendimi përfundimtar u takon votuesve.
Palmer, i cili ka më shumë se tri dekada përvojë në diplomacinë amerikane, ka shërbyer si zëvendësndihmës sekretar i Shtetit për Çështjet Evropiane dhe Euroaziatike.
