Jeta në Maqedoninë e Veriut po bëhet gjithnjë e më e shtrenjtë.
Gjatë muajit tetor, kostoja e jetesës është rritur për 0.4% krahasuar me shtatorin, ndërsa në krahasim me tetorin e vitit të kaluar, rritja arrin në 3.3%.
Sipas Entit Shtetëror të Statistikave, pijet alkoolike dhe duhani janë shtrenjtuar më shumë, me një rritje prej 2.5%.
Veshjet dhe këpucët, si dhe shpenzimet për rekreacion, sport dhe kulturë, kanë pësuar një rritje prej 1.2%.
Ushqimet dhe pijet joalkoolike, që përbëjnë një pjesë të rëndësishme të shpenzimeve të përditshme të qytetarëve, janë shtrenjtuar për 0.7%.
Megjithatë, gjatë muajit tetor, disa kategori produktesh dhe shërbimesh kanë shënuar ulje të çmimeve.
Mobiljet dhe pajisjet shtëpiake janë liruar për 1.3%, restorantet dhe shërbimet e akomodimit për 0.7%, ndërsa transporti ka pësuar një ulje prej 0.3%.
Kur krahasojmë me tetorin e vitit të kaluar, shtrenjtimi në disa kategori është dukshëm më i theksuar.
Transporti kryeson me një rritje prej 9.5%, duke e bërë këtë sektor të jetë shumë më i shtrenjtë se një vit më parë.
Pas tij renditen rekreacioni, sporti dhe kultura me një rritje prej 8.5%, si dhe pijet alkoolike dhe duhani me 7.8%. Çmimet me pakicë në përgjithësi kanë shënuar një rritje vjetore prej 3.2%.
Rritja më e theksuar është regjistruar te derivatet e naftës, kryesisht si pasojë e konfliktit SHBA-Iran, një rritje që ka ndikuar negativisht në të gjitha industritë e tjera.
