Situata në bulevardin kryesor ka hyrë në një fazë të re kontrolli nga forcat e sigurisë, pas intensifikimit të sulmeve me mjete të ndryshme rrethanore dhe piroteknike ndaj efektivëve dhe institucioneve.
Sipas zhvillimeve më të fundit në terren, pas hedhjes së gurëve, molotovëve dhe breshërive me fishekzjarre në drejtim të forcave të rendit dhe objekteve të ndryshme, Policia e Shtetit është detyruar të ndërhyjë me makinat e ujit me presion për të shpërndarë protestuesit.
Kjo ndërhyrje masive ka rezultuar në largimin e shpejtë të pjesëmarrësve nga vatra kryesore e tensioneve.
Aktualisht, sheshi përpara Kryeministrisë deri te ura e Lanës është boshatisur.
