Kryeministri i Shqipërisë, Edi Rama, u takua të martën në Bruksel me Sekretarin e Përgjithshëm të NATO-s, Mark Rutte.
Diskutimet u përqendruan në sigurinë euroatlantike, forcimin e bashkëpunimit midis vendeve aleate dhe rolin e Shqipërisë në kuadër të Aleancës.
Sipas njoftimit nga Agjencia për Media dhe Informim, gjatë këtij takimi u trajtuan sfidat aktuale të sigurisë, me një theks të veçantë në kërcënimet hibride, sulmet kibernetike, dezinformimin, ndërhyrjet e huaja dhe mbrojtjen e infrastrukturës kritike.
Të dyja palët vlerësuan rëndësinë e një bashkërendimi më të madh midis vendeve anëtare të NATO-s për përballimin e këtyre rreziqeve.
Një tjetër temë e rëndësishme e diskutuar ishte zhvillimi i Korridorit VIII si korridor i mobilitetit ushtarak, i cili lidh Adriatikun me Detin e Zi dhe konsiderohet i rëndësishëm për lëvizshmërinë dhe gatishmërinë operacionale të NATO-s në krahun juglindor.
Në këtë kontekst, u diskutua edhe projekti i Porto Romanos dhe potenciali i tij për zhvillimin e kapaciteteve infrastrukturore dhe logjistike në mbështetje të Aleancës.
Gjatë takimit, u riafirmua gjithashtu se Samiti i ardhshëm i NATO-s do të zhvillohet në Tiranë, në përputhje me vendimin e marrë më herët nga vendet anëtare.
Organizimi i këtij samiti do ta vendosë Shqipërinë në rolin e vendit mikpritës të forumit më të lartë politik të Aleancës, ndërsa Ballkani Perëndimor pritet të jetë pjesë e diskutimeve për sigurinë dhe stabilitetin euroatlantik.
Në fund, Shqipëria riafirmoi angazhimin e saj për forcimin e partneritetit transatlantik dhe përmbushjen e detyrimeve që rrjedhin nga anëtarësimi në NATO, si dhe parimin e mbrojtjes kolektive.
