Sot shënojmë 6 vjet që nga momenti kur Hashim Thaçi, Jakup Krasniqi, Kadri Veseli dhe Rexhep Selimi u vunë në paraburgim në Hagë.
Gati dy muaj pas aktgjykimit të shkallës së parë, kanë filluar hapat e parë në Kosovë për të përgatitur mbrojtjen dhe për ta rrëzuar atë në Apel.
Një prej simptomave të drejtësisë kosovare ka qenë edhe Gjykata Speciale, një institucion kosovar që operon në Holandë.
Sot, e enjte, përkujtojmë gjashtë vjet nga dita kur Hashim Thaçi, Kadri Veseli, Jakup Krasniqi dhe Rexhep Selimi u arrestuan – dhe 72 muaj më vonë, për ta ka vetëm një verdikt nga shkalla e parë.
Mbajtja e gjatë në paraburgim, refuzimi i vazhdueshëm për masa të tjera sigurie nga Gjykata, si dhe procedurat gjyqësore të zgjatura, kulmuan me një verdikt të rëndë që i dënoi ata me 81 vjet burgim.
Ky proces, sipas Vlora Çitakut, ka vënë në pikëpyetje vetë historinë e UÇK-së dhe rrugën e Kosovës drejt lirisë e pavarësisë. “Por historia jonë nuk fillon në sallat e gjyqit në Hagë.
Dhe nuk mund të rishkruhet nga një aktgjykim!” – shprehet Çitaku, deputete dhe ushtruese detyrës së kryetares së PDK-së, e cila gjithashtu thekson punën që po bëhet në strategjinë shtetërore dhe ndryshimet në ligjin për specialen.
Në Kuvend sot, fjalën e mori edhe Altin Krasniqi, djali i Jakup Krasniqit, i cili tha se katërshja e ndëshkuar u dënua për shkak të posteve politike që ata kishin mbajtur. “….Kjo ka vetëm një arsye, duan t’i përlyejnë dhe baltosin objektivat e UÇK-së, objektivat e kësaj drejtorie politike, të cilat ishin të njëjta ndër breza, liria dhe pavarësia e Kosovës, liri kjo e pavarësi që u arritën me shumë mund e gjak,” theksoi deputeti i PDK-së, Altin Krasniqi.
Dënimi me 81 vjet burgim për Hashim Thaçin, Kadri Veselin, Jakup Krasniqin dhe Rexhep Selimin ka shkaktuar reagime të ashpra nga qytetarët, dhe nga PDK ka pasur nisma për ndryshimin e Ligjit për Specialen, që pas miratimit u kthye në Kuvend për rishqyrtim me kërkesë të kësaj partie.
Njëkohësisht, qeveria ka themeluar Grupin Punues për hartimin, bashkërendimin dhe harmonizimin e Strategjisë Shtetërore lidhur me procedurat e Apelit, që javën e kaluar mbajti takimin konstituiv, dhe këtë të shtunë do të mbajë takimin e ardhshëm, por kryesuesi tha se ato do të jenë konfidenciale, duke sqaruar arsyet. “Për shkak të natyrës së qëllimeve që don me arritë ky grup strategjik, qëllimi është që me e fituar rastin, me e fituar rastin në procesin e apelit, që është e cila diskutohet aty edhe qëllimet tona janë shumë të ndjeshme, edhe në kuptimin vendor, por edhe në kuptimin ndërkombëtar, kështu që kisha kërkuar një mirëkuptim nga mediat që ajo se si do të zhvillohet,” tha zëvendëskryeministri, Glauk Konjufca.
Po ashtu, nga ekzekutivi është përmendur edhe rritja e buxhetit për mbrojtjen e tyre, para se verdikti të shqyrtohet në Apel.
