Pagat e punonjësve në prokurori pritet të rriten deri në 40 përqind, por kjo rritje do të realizohet në faza.
Prokurori Publik i Shtetit, Nenad Saveski, e njoftoi këtë duke theksuar se marrëveshja e re kolektive ka parasysh një përmirësim të statusit material dhe kushteve të punës për punonjësit në prokurori.
Saveski në një intervistë për “Click Plus” në “TV21” theksoi se rritja nuk do të ndodhë njëherësh, por do të zbatohet gradualisht, me synimin për të arritur një nivel prej 40 përqind më të lartë se të ardhurat aktuale gjatë një periudhe të caktuar.
Ai vlerësoi se përmirësimi i kushteve financiare është një hap i rëndësishëm drejt motivimit dhe profesionalizmit më të lartë ndër punonjësit, si dhe drejt uljes së rrezikut të korrupsionit.
