Prokuroria Themelore në Pejë, nëpërmjet Departamentit për Krime të Rënda, ka ngritur aktakuzë ndaj të pandehurit me inicialet J.J., nën dyshimin për kryerjen e veprave penale “Vrasja e rëndë” dhe “Mbajtja në pronësi, kontroll ose posedim të paautorizuar të armëve”, sipas Kodit Penal të Republikës së Kosovës.
Sipas aktakuzës, më 21 mars 2026, rreth orës 15:00, në fshatin Bokshiq, Komuna e Klinës, i pandehuri, pas një mosmarrëveshjeje për çështje pronësore mes viktimës dhe babait të tij, dyshohet se ka marrë një armë zjarri nga shtëpia dhe ka shtënë katër herë në drejtim të viktimës, vëllait të tij. “Si pasojë e plagëve të marra, viktima ka pësuar gjakderdhje të madhe të brendshme dhe të jashtme, për shkak të dëmtimit të arteries në këmbën e majtë, dhe më pas ka ndërruar jetë në Spitalin Rajonal të Pejës”, thuhet në njoftim.
Po ashtu, sipas aktakuzës, i pandehuri ka mbajtur dhe poseduar pa autorizim një pistoletë të kalibrit 9×19 mm, së bashku me një karikator dhe dhjetë fishekë të të njëjtit kalibër, për të cilën nuk kishte leje nga organet kompetente.
