Rreth 12 mijë fëmijë të moshës 12–17 vjeç në Maqedoni janë të ekspozuar ndaj abuzimit apo shfrytëzimit seksual në internet, sipas një hulumtimi të UNICEF-it.
Kjo do të thotë se çdo i dhjeti fëmijë që përdor internetin është përballur me këtë fenomen.
Në 78 për qind të rasteve, abuzuesi ka qenë një person i njohur për fëmijën.
Megjithatë, përkundër faktit se 88 për qind e fëmijëve kanë treguar përvojën e tyre, më pak se një për qind e tyre e kanë denoncuar rastin zyrtarisht.
Ndërkohë, linja SOS „Alo Bushavko“ ka regjistruar deri më 18 nëntor 360 raste, me një rritje prej 25 për qind të thirrjeve.
Organizatat për mbrojtjen e fëmijëve kanë ngritur shqetësime serioze për përhapjen e abuzimit seksual në hapësirën digjitale dhe kërkojnë më shumë parandalim, bashkëpunim institucional dhe mbështetje për fëmijët.