Bullgaria nuk sheh nevojë për ndërmjetës në bisedimet me Maqedoninë e Veriut, duke e konsideruar se çështjet që lidhen me procesin e integrimit evropian tashmë janë përcaktuar në nivel evropian.
Këtë e tha ministrja e Jashtme e Bullgarisë, Velislava Petrova-Çamova, gjatë një përgjigjeje për deputetët në Kuvendin bullgar. „Nuk është e zakonshme që të ketë ndërmjetës mes një vendi anëtar të Bashkimit Evropian dhe një vendi kandidat për marrëveshje që nuk kanë karakter dypalësh, por janë miratuar dhe aprovuar në nivel evropian.
Ky është një qëndrim shumë i qartë i Bullgarisë“, theksoi Petrova-Çamova.
Ajo theksoi se Sofja pret që Maqedonia e Veriut të tregojë gatishmëri për ndryshimin e narrativës politike ndaj Bullgarisë. „Është e rëndësishme të shohim nga Republika e Maqedonisë së Veriut gatishmëri për një narrativë politike që nuk është antibullgare, e cila deri më tani ka qenë dominuese“, tha Petrova-Çamova.
Sipas saj, dialogu ndërmjet dy vendeve do të jetë i vështirë përderisa nuk ndryshon kjo qasje.
Ajo i hodhi poshtë si të pabazuara pretendimet se Bullgaria mund të vendosë kërkesa shtesë ose të ndryshojë qëndrimin e saj të deritanishëm. „Në dialogun me Republikën e Maqedonisë së Veriut, qeveria dhe Ministria e Punëve të Jashtme udhëhiqen nga konsensusi i vitit 2022 dhe vendimet e mëvonshme të Kuvendit bullgar, të cilat e përcaktojnë qartë qëndrimin e Bullgarisë“, theksoi ministrja.
Deklarata e saj vjen pas propozimit të kryeministrit të Maqedonisë së Veriut, Hristijan Mickoski, që të përfshihen përfaqësues të Bashkimit Evropian si ndërmjetës në bisedimet me Sofjen.
Ministri i Punëve të Jashtme, Timço Mucunski, më herët theksoi se dialogu për çështjet e hapura ka mbështetje nga institucionet evropiane dhe vendet anëtare të Bashkimit Evropian.
