Maqedonia e Veriut ka flotën më të vjetër të automjeteve në mesin e vendeve të rajonit, me një moshë mesatare prej 19.4 vjetësh, sipas analizës së “Al Jazeera Balkans”.
Edhe pse numri i automjeteve të regjistruara ka dyfishuar nga viti 2012 deri më 2024, mosha mesatare e tyre ka mbetur pothuajse e pandryshuar.
Në vitin 2024, në vend ishin regjistruar rreth 700 mijë automjete, krahasuar me afërsisht 350 mijë në vitin 2012.
Kjo do të thotë se për çdo 1.000 banorë ka rreth 383 automjete të regjistruara.
Një shqetësim i madh është se 87.9 për qind e automjeteve janë më të vjetra se shtatë vjet.
Mosha mesatare e tyre është dukshëm më e lartë se mesatarja e Bashkimit Evropian, e cila është 12.7 vjet.
Në krahasim me vendet e tjera të rajonit, Kosova ka një moshë mesatare të automjeteve prej 18 vjetësh, Greqia 17.3 vjet dhe Mali i Zi 17.06 vjet.
Kroacia ka një mesatare prej 14.63 vjet, ndërsa Sllovenia 11.2 vjet.
Një nga arsyet kryesore për këtë situatë është importi masiv i veturave të përdorura nga Evropa Perëndimore, sidomos nga Gjermania dhe Italia.
Shumë qytetarë në Ballkan, për shkak të fuqisë së kufizuar blerëse, e kanë të vështirë të përballojnë çmimet e automjeteve të reja.
Disa vende të rajonit kanë vendosur kufizime për importin e automjeteve të vjetra, veçanërisht atyre me naftë.
Në Bosnjë e Hercegovinë dhe Mal të Zi janë ndaluar disa kategori të automjeteve të vjetra me naftë, ndërsa Serbia vazhdon të lejojë importin edhe të veturave më të vjetra se 20 vjet.
