Ministrja e Energjisë, Minierave dhe Burimeve Minerale, Sanja Bozhinovska, mori pjesë në një takim të rëndësishëm të punës në kuadër të programit Falcon, i organizuar në bashkëpunim me kompaninë globale BAE Systems dhe me mbështetje nga ambasada e SHBA-së.
Në këtë takim u prezantuan rezultatet e vlerësimit dhe analizave të bëra në terren për sistemet e TI-së të Ministrisë së Energjetikës, Minierave dhe Lëndëve të Para Minerale.
Ekspertët e BAE Systems e vlerësuan ekipin e TI-së të ministrisë si një prej ekipeve më të përgatitura me të cilat kanë bashkëpunuar, duke theksuar përkushtimin e tyre të lartë ndaj sigurisë kibernetike dhe zbatimin e vazhdueshëm të standardeve ndërkombëtare.
Në këtë takim, u diskutua për rëndësinë e mbrojtjes digjitale në sektorin energjetik, gjithashtu u propozuan krijimi i një Qendre Sektoriale për Operacione të Sigurisë (SOC) si dhe mundësitë për financimin e saj përmes fondeve evropiane dhe Agjendës së Reformave.
Qëllimi i krijimit të kësaj qendre është që institucionet në sektorin energjetik të identifikojnë me kohë kërcënimet kibernetike dhe të reagojnë në mënyrë të koordinuar, duke siguruar kështu vazhdimësinë e ofrimit të shërbimeve energjetike për qytetarët dhe bizneset. “Siguria e infrastrukturës së TI-së është thelbësore për stabilitetin tonë energjetik.
Me krijimin e kësaj qendre sektoriale dhe me mbështetjen e partnerëve tanë strategjikë, sigurojmë mbrojtje moderne nga kërcënimet digjitale dhe garantojmë funksionimin e pandërprerë të sistemit energjetik,” theksoi ministrja Bozhinovska.
Në këtë takim u rikonfirmuan gjithashtu partneriteti strategjik dhe përpjekjet e përbashkëta për forcimin e infrastrukturës kritike dhe sigurisë energjetike të vendit.
