Gjermania Planifikon Të Ulet Kuota Vjetore Për Punëtorët Nga Ballkani Perëndimor

Gjermania ka në plan të përgjysmojë kuotën vjetore për pranimin e punëtorëve nga vendet e Ballkanit Perëndimor, duke përfshirë Maqedoninë e Veriut.

Aktualisht, numri i lejeve të para të punësimit është 50.000, por pritet të ulet në 25.000 në vit.

Qeveria gjermane, më 4 nëntor, miratoi një propozim që parasheh këtë përgjysmim për ata që dëshirojnë të punojnë në Gjermani përmes rregullores së posaçme për Ballkanin Perëndimor.

Rregullat e reja pritet të hyjnë në fuqi më 1 janar 2027, megjithatë, miratimi i Bundesratit, dhoma përfaqësuese e landeve gjermane, është i nevojshëm, dhe ky propozim do të shqyrtohet më 18 dhjetor.

Masa përfshin qytetarët e gjashtë vendeve: Maqedoninë e Veriut, Serbinë, Shqipërinë, Bosnjë e Hercegovinën, Malin e Zi dhe Kosovën.

Rregullorja e posaçme, e vendosur në vitin 2016, ka lehtësuar mundësitë për punësim të qytetarëve nga këto vende, duke lejuar punësim edhe pa kualifikime profesionale të njohura zyrtarisht.

Me ndryshimin e propozuar, numri i lejeve të reja do të zvogëlohej për 25.000 në vit, duke e bërë më të vështirë punësimin për ata që synojnë të punojnë në Gjermani.

Megjithatë, ky propozim ka hasur në kundërshtime nga disa punëdhënës gjermanë, shoqatat ekonomike dhe shtatë lande, të cilët paralajmërojnë se kufizimi do ta thellojë mungesën e fuqisë punëtore.

Agjencia Federale Gjermane e Punësimit gjithashtu ka shprehur kundërshtim ndaj uljes së kuotës, duke vlerësuar se ajo duhet të mbetet e pandryshuar.

Sipas të dhënave të kësaj agjencie, në shtator të vitit 2026, rreth 546.000 qytetarë nga vendet e Ballkanit Perëndimor ishin të punësuar në Gjermani dhe paguanin kontribute për sigurim social.

Autoritetet gjermane theksojnë se ulja e planifikuar buron nga marrëveshja e koalicionit qeverisës dhe vendimet paraprake për të kufizuar migrimin e fuqisë punëtore.

Nëse propozimi miratohet përfundimisht, kuota e re do të zbatohet nga fillimi i vitit të ardhshëm, por kjo nuk do të thotë ndalim të përgjithshëm për punësimin e qytetarëve të Maqedonisë së Veriut në Gjermani, pasi do të vazhdojnë të ekzistojnë edhe rrugë të tjera ligjore për të hyrë në tregun gjerman të punës.

Leave a Reply

Your email address will not be published. Required fields are marked *