Dogana e Kosovës ka njoftuar se, si pjesë e aktiviteteve të saj të vazhdueshme për të luftuar kontrabandën dhe për të mbrojtur tregun, ka realizuar kontrolle në tri argjendari në Prishtinë.
Gjatë këtyre kontrolleve, në njërën prej argjendarive është zbuluar dhe konfiskuar një sasi prej 952,54 gramësh ari të përpunuar, e cila ka një vlerë të përafërt prej 120,000 eurosh.
Për këtë sasi janë ndërmarrë veprimet përkatëse sipas legjislacionit doganor në fuqi.
Në një argjendari tjetër, gjatë kontrollit është konstatuar prania e rreth 5 kilogramëve ari të pashenjëzuar, pa vulat përkatëse të kontrollit dhe shenjëzimit.
Dogana e Kosovës ka njoftuar se ka kërkuar asistencën e Inspektoratit kompetent të Ministrisë së Industrisë, Ndërmarrësisë dhe Tregtisë (MINT) në lidhje me këtë rast.
Inspektorët përkatës kanë marrë në trajtim sasinë e identifikuar të arit për të kryer procedurat e nevojshme të verifikimit dhe shenjëzimit, në përputhje me legjislacionin e aktualizuar. “Dogana e Kosovës mbetet e përkushtuar në luftimin e kontrabandës dhe tregtisë së paligjshme të metaleve të çmuara, si dhe në forcimin e bashkëpunimit ndërinstitucional për garantimin e konkurrencës së ndershme, mbrojtjen e konsumatorëve dhe respektimin e detyrimeve ligjore.”
