Partia në pushtet, OBRM-PDUKM, ka hedhur akuza të reja ndaj LSDM-së dhe liderit të saj, Venko Filipçe, në lidhje me rastin e Alta Bankës, duke pretenduar se pas kritikave dhe reagimeve të tyre publike qëndrojnë interesa biznesore të lidhura me LSDM-në dhe familjen Zaev.
OBRM-PDUKM vlerëson se LSDM ka politizuar temën e Alta Bankës për muaj të tërë, me qëllimin për të krijuar mosbesim te qytetarët dhe për të dëmtuar reputacionin dhe pozitat e bankës në treg.
Sipas OBRM-PDUKM-së, përmes presioneve ndaj Bankës Popullore dhe Alta Bankës, po krijohen kushte për blerjen e saj me çmim më të ulët nga qarqe biznesi të afërta me Filipçen dhe familjen Zaev.
Partia referohet gjithashtu në deklaratën e sekretarit të përgjithshëm të LSDM-së, Aleksandar Dimitrijeviq, për pagesën e pensioneve për shfrytëzuesit e Alta Bankës.
OBRM-PDUKM akuzon LSDM-në për përhapje paniku ndër qytetarët dhe për keqpërdorim politik të rastit, duke theksuar se pas reagimeve publike qëndrojnë interesa private ekonomike.
Ata gjithashtu e sigurojnë publikun se qytetarët nuk duhet të frikësohen për pagesën e pagave dhe pensioneve, duke theksuar se gjatë qeverisjes së udhëhequr nga Hristijan Mickoski, këto do të paguhen rregullisht.
