Instituti Hidrometeorologjik njofton se gjatë fundjavës do të mbajë mot kryesisht me vranësira të shpërndara dhe me diell.
Temperaturat do të jenë relativisht të ulëta, sidomos gjatë mëngjesit, kur priten vlera negative.
Të shtunën, më 7 nëntor, temperaturat minimale do të variojnë nga -3 deri në 0°C, ndërsa ato maksimale do të lëvizin nga 6 deri në 11°C.
Era do të fryjë nga veriperëndimi me shpejtësi 1–4 m/s.
Edhe të dielën, më 8 nëntor, parashikohet mot i ngjashëm, me vranësira të shpërndara dhe intervale me diell.
Temperaturat minimale do të zbresin nga -4 deri në -1°C, ndërsa maksimalet do të arrijnë nga 8 deri në 12°C.
Era do të fryjë nga verilindja me shpejtësi 1–3 m/s.
Në përgjithësi, fundjava do të karakterizohet nga mot i qëndrueshëm, me alternime mes vranësirave dhe diellit, mëngjese të ftohta dhe temperatura më të buta gjatë ditës.
Era do të jetë e lehtë, pa ndonjë ndikim të theksuar në kushtet e motit.
Kushtet biometeorologjike gjatë fundjavës do të jenë kryesisht të mira dhe relativisht të favorshme.
Megjithatë, temperaturat e ulëta në mëngjes mund të ndikojnë në ndjesinë e të ftohtit, veçanërisht te ata që janë më të ndjeshëm ndaj ndryshimeve të motit, si të moshuarit dhe ata me sëmundje kronike.
Gjatë ditës, me paraqitjen e intervaleve me diell, pritet të ketë kushte më të përshtatshme për aktivitete në ambient të hapur.
