Policia e Kosovës ka realizuar një operacion në fshatin Dubovë e Madhe të Pejës, ku ka sekuestruar një armë zjarri dhe rreth 300 gramë substancë të dyshuar narkotike të llojit marihuanë.
Sipas njoftimit të Policisë, kontrolli është kryer më 8 nëntor, rreth orës 13:05, si pjesë e një hetimi operativ, nga zyrtarët e Stacionit Policor në Pejë, me mbështetje nga njësiti i NJRSH-së.
Gjatë këtij kontrolli, policia ka gjetur dhe sekuestruar një pistoletë të modifikuar, një karikator, tre fishekë, rreth 300 gramë marihuanë, një peshore dhe disa qese të dyshuara për paketimin e substancës narkotike.
Një person është arrestuar në lidhje me këtë rast, dhe pas intervistimit, me vendim të prokurorit të shtetit, ai është ndaluar për 48 orë.
Hetimet për këtë rast po vazhdojnë në koordinim me Prokurorinë e Shtetit.
