Dy ndërmarrjet publike “Hekurudhat e Maqedonisë Transport” dhe “Hekurudhat e Maqedonisë Infrastrukturë” kanë pranuar dy raportet revizore për periudhën kur udhëheqësinë e kishin kuadrot e BDI-së dhe LSDM-së.
Në raportin revizor, i cili është përgatitur me kërkesë të udhëheqësisë aktuale, janë evidentuar probleme të rëndësishme, dhe për to tashmë janë ndërmarrë masa, njoftoi Ministria e Transportit. “Konsiderojmë se në bazë të anomalive të konstatuara në raport dhe problemeve kyçe që janë injoruar nga udhëheqësit e mëparshëm, këto ndërmarrje publike kanë arritur në prag të dështimit dhe shkatërrimit të plotë,” theksohet në kumtesë.
Ministria apelon te prokuroritë publike dhe institucionet përkatëse që t’i verifikojnë konstatimet e Entit Shtetëror të Revizionit. “Enti Shtetëror i Revizionit, në përmbushje të detyrave të tij zyrtare, duhet t’i dërgojë raportet te institucionet kompetente, ndërsa ato në tërësi do të dërgohen në Prokurorinë Themelore Publike.
Bëjmë thirrje që të merren seriozisht me këto raporte.
Raportet për dy ndërmarrjet publike, “Hekurudhat e Maqedonisë Transport” dhe “Hekurudhat e Maqedonisë Infrastrukturë” përfshijnë punën deri në vitin 2024, dhe është kryer revizion i raporteve financiare së bashku me revizionin dhe harmonizimin e këtyre ndërmarrjeve publike,” theksojnë nga Ministria.
