Propozimi i Ministrisë së Drejtësisë për të mbajtur provimin e jurisprudencës në dy gjuhë, maqedonisht dhe shqip, është një hap racional, sipas akademikut Vllado Kambovski.
Ai e theksoi se studentët shqiptarë e refuzuan këtë propozim ditën e premte dhe kërkojnë që provimi të zhvillohet tërësisht në gjuhën shqipe, përndryshe do të vazhdojnë me protestat.
Kryeministri Hristijan Mickoski ka shprehur qartë se pjesa gojore e provimit do të mbetet në gjuhën maqedonase, duke insistuar që maqedonishtja të jetë “lingua franca” në sistemin gjyqësor.
Në këtë kontekst, Kambovski për “Sloboden Peçat” u shpreh se është thelbësore të kemi një terminologji ligjore të harmonizuar dhe kurrikula të përbashkëta në fakultetet e drejtësisë.
Ai propozon një iniciativë për harmonizimin e terminologjisë dhe literaturës të detyrueshme. “Në kushtet aktuale, ky propozim duket racional, pasi këto janë fushat më të ndjeshme në drejtësi, ku është jashtëzakonisht e rëndësishme të kemi një terminologji ligjore të harmonizuar, si dhe përdorimin e saj në gjuhë të ndryshme.
Terminologjia ligjore në vendin tonë nuk është e mjaftueshme dhe e zhvilluar për të gjitha gjuhët e nevojshme për provimin, prandaj harmonizimi i kurrikulave në të gjitha fakultetet juridike është i domosdoshëm, jo vetëm për këto dy lëndë, por edhe për të tjera.
I propozova Ministrit të Drejtësisë dhe kolegëve që të fillojnë një iniciativë në të gjitha fakultetet juridike që, pavarësisht gjuhës së studimit, të kenë një fond të unifikuar të njësive të detyrueshme dhe literaturë të harmonizuar për të gjitha lëndët, pavarësisht nëse është në maqedonisht, anglisht, shqip apo ndonjë gjuhë tjetër”, përfundoi Kambovski.
