Protesta e studentëve dhe të rinjve në Tiranë vazhdon të mbajë ritmin e saj për të tetën ditë radhazi.
Këtë të martë, protestuesve iu bashkuan edhe pedagogët, ndërsa thirrjet për dorëheqjen e kryeministrit Edi Rama nuk ndalen.
Ftesa e tij për dialog u hodh poshtë nga protestuesit, të cilët hodhën karriget e vendosura para Kryeministrisë me mbishkrimin “Dialog”.
Studentë, nxënës, të rinj dhe pedagogë u mblodhën këtë të martë para Kryeministrisë në Tiranë, duke shënuar ditën e tetë të protestave që nisën më 13 tetor.
Kjo protestë vazhdon si reagim ndaj situatës së vështirë në arsim, ndërsa kërkesave të protestuesve iu është shtuar edhe kërkesa për dorëheqjen e kryeministrit Edi Rama.
Ndryshe nga përplasjet dhe tensionet e regjistruara më parë, protestuesit këtë herë u mblodhën në një atmosferë më të qetë, dhe marshimi i studentëve dhe pedagogëve drejt Kryeministrisë ishte një nga ngjarjet kryesore të ditës.
Pak para fillimit të protestës, kryeministri Rama vendosi disa karrige të kuqe para godinës së Kryeministrisë, mbi të cilat ishte vendosur mbishkrimi “Dialog”.
Me këtë gjest simbolik, ai ftoi studentët dhe të rinjtë të ulen në tryezën e bisedimeve.
Megjithatë, kjo ftesë u refuzua nga protestuesit.
Disa prej tyre iu afruan karrigeve dhe i hodhën ato, duke shprehur kështu kundërshtimin ndaj propozimit të kryeministrit.
Më herët gjatë ditës, Rama tha se është i gatshëm të zhvillojë dialog me studentët, por përjashtoi çdo kusht që lidhet me dorëheqjen e tij.
Ai theksoi se dhuna e regjistruar gjatë protestave nuk përfaqëson studentët dhe nxënësit në tërësi.
Protestat, të cilat fillimisht u nxitën nga pakënaqësitë për situatën në arsim, janë zgjeruar gjatë javës së fundit me kërkesa politike.
Gjatë ditëve të mëparshme, janë regjistruar përplasje me policinë, përdorim i mjeteve piroteknike dhe molotovëve, si dhe dëmtime të institucioneve publike dhe bizneseve.
Sipas bilancit të Ministrisë së Shëndetësisë, deri më 19 tetor, gjithsej 310 persona kishin marrë ndihmë mjekësore që nga nisja e protestave, mes të cilëve 191 punonjës policie, 88 protestues dhe 31 kalimtarë.
