Dita e 12-të e protestave në Shqipëri ka sjellë përplasje të ashpra mes protestuesve dhe forcave të Policisë.
Institucionet shëndetësore raportojnë për një numër të madh personash të lënduar, disa prej të cilëve me pasoja të rënda.
Po ashtu, janë shkaktuar dëme të konsiderueshme në institucione publike dhe biznese private.
Megjithatë, palët ende nuk kanë treguar gatishmëri për kompromis, duke lënë të paqartë mundësinë e një zgjidhjeje përmes dialogut.
Protestuesit kanë hedhur gurë dhe mjete piroteknike ndaj policisë, e cila ka reaguar me topa uji, gaz lotsjellës dhe plumba gome.
Policia ka përdorur ujë për shpërndarjen e turmës, ndërsa ka pasur përplasje te sheshi “Skënderbej”, në bulevard dhe pranë Bashkisë së Tiranës.
Tensionet janë zhvendosur gjithashtu përgjatë rrugës “George W.
Bush”, përballë godinës së Kuvendit të Shqipërisë, ku ka ndodhur një tjetër përplasje e fortë mes protestuesve dhe forcave të rendit.
Gjatë kësaj përballjeje, disa grupe protestuesish kanë sulmuar linjën e kordonit policor me mjete të ndryshme dhe piroteknikë.
Për të neutralizuar trazirat dhe për të shpërndarë turmën, policia ka reaguar ndaj sulmeve me ujë me presion dhe gaz lotsjellës.
Fokus i grupeve të protestuesve ka qenë infrastruktura publike dhe private në qendër të kryeqytetit, duke lënë pas dëme të konsiderueshme materiale.
Sipas raportimeve paraprake nga spitalet dhe poliklinikat e kryeqytetit, fluksi më i madh i të lënduarve është regjistruar në Spitalin Universitar të Traumës.
Nga urgjenca e këtij spitali bëhet me dije se “janë paraqitur 9 persona të lënduar, mes tyre 7 protestues dhe 2 përfaqësues të medias”.
Autoritetet sqarojnë se “njëri prej protestuesve ka pësuar dëmtim në sy dhe po i nënshtrohet ekzaminimeve, ndërsa ndodhet jashtë rrezikut për jetën”.
Duhet theksuar se protestës sot i është bashkuar edhe opozita, e cila vazhdon të kërkojë dorëheqjen e kryeministrit Edi Rama.
Rama, gjatë ditës, mbrojti efektivët e policisë, duke u shprehur se ata janë nën sulmin edhe të disa mediave.
Protestat e këtij muaji janë nxitur nga pakënaqësitë mbi sistemin arsimor, mungesën e vendeve të punës dhe perceptimin e korrupsionit në qeverisje.
Ato pasojnë protesta disamujore, kryesisht paqësore, kundër një projekti turistik luksoz në bregdet.
Rama ka refuzuar të japë dorëheqje dhe të shtunën përsëriti ftesën për dialog.
Protesta nisi në orën 14:00 te Ministria e Arsimit, dhe më pak se 30 minuta pas fillimit, protestuesit nisën të hedhin gurë drejt ndërtesës së kësaj ministrie dhe zyrtarëve policorë.
Si pasojë e hedhjes së bombave molotov, janë shënuar disa vatra zjarri, ndërsa protestuesit kanë djegur kioska, kanë vënë flakën koshave të mbeturinave dhe kanë dëmtuar vitrina të dyqaneve përgjatë rrugëve.
Dhuna në protestën e së shtunës erdhi pasi për disa ditë protestat kishin qenë paqësore.
