Punëtorët e Korporatës Energjetike të Kosovës (KEK) do të protestojnë të enjten, më 12 nëntor, duke kërkuar rritjen e pagave dhe realizimin e pagës së 13-të.
Protesta, e organizuar nga Sindikata e Re – KEK, është paralajmëruar të mbahet në orën 11:00, para zyrave të menaxhmentit të korporatës në Prishtinë.
Sipas njoftimit të sindikatës, kërkesat kryesore të punëtorëve janë ngritja dhe nivelizimi i pagave, si dhe realizimi i pagës së 13-të për të gjithë të punësuarit në KEK për vitin 2026.
Organizatoret theksojnë se protesta synon përmirësimin e kushteve financiare dhe trajtimin e barabartë të punëtorëve. “Për paga dinjitoze, për barazi dhe për respektimin e të drejtave të punëtorëve!”, thuhet në njoftimin e Sindikatës së Re – KEK.
Protesta është paralajmëruar për 12 nëntor, ndërsa në njoftim nuk janë dhënë hollësi për kohëzgjatjen e saj apo për veprimet e mundshme sindikale pas kësaj date.
