Organizata e Veteranëve të Luftës së Ushtrisë Çlirimtare të Kosovës (OVL-UÇK) ka shprehur shqetësimin e saj pas njoftimit të Gjykatës Speciale për organizimin e 240 konferencave për media.
Ata kritikuan mungesën e transparencës dhe kërkuan një drejtësi të paanshme, një proces gjyqësor të hapur dhe respektimin e të drejtave themelore të njeriut.
Në reagimin e tyre, OVL-UÇK ka drejtuar kritika të forta ndaj kryetares së Dhomave të Specializuara, Ekaterina Trendafilova. “Znj.
Trendafilova, ju dhe Gjykata Speciale që udhëheqni, jeni turpi i drejtësisë ndërkombëtare!” thuhet në reagimin e OVL-UÇK-së.
Sipas OVL-UÇK-së, organizimi i konferencave për media nuk është i mjaftueshëm për të siguruar transparencën dhe drejtësinë në proceset gjyqësore. “Gjykata Speciale mund të ketë organizuar 240 konferenca për media, por qytetarët e Kosovës nuk kanë nevojë për 240 konferenca për ta kuptuar drejtësinë.
Ata kanë nevojë për drejtësi të paanshme, transparencë në proces dhe respektim të të drejtave themelore të njeriut.
Komunikimi transparent nuk mund të shërbejë si mbulesë për shkeljet e mundshme në proceset gjyqësore,” theksohet në reagimin e organizatës.
OVL-UÇK gjithashtu ka ngritur pyetje të rëndësishme lidhur me transparencën e Gjykatës Speciale, duke përfshirë pretendimet dhe shqetësimet e mbrojtjes, kushtet e paraburgimit dhe të drejtat e të akuzuarve. “A ka qenë po aq transparente edhe për pretendimet dhe shqetësimet e mbrojtjes, për ankesat lidhur me kushtet e paraburgimit dhe për pretendimet për shkelje të të drejtave të të akuzuarve?” pyet OVL-UÇK-ja.
