Komisioni Shtetëror i Zgjedhjeve, në Seancën e 26-të, miratoi unanimisht Konkluzionin për shpalljen e rezultateve fillestare të Zgjedhjeve të Parakohshme për Kryetar të Komunës së Bërvenicës, sipas Procesverbalit të dorëzuar – Formulari nr. 21 B i mbledhjes së rezultateve të votimit.
Sipas të dhënave nga Procesverbali i Komisionit Komunal të Zgjedhjeve Bërvenicë (Formulari nr. 21B), në Listën Zgjedhore për komunën ishin të regjistruar gjithsej 16.256 votues.
Të drejtën e votës e ushtruan 8.828 qytetarë, ose 54,31% e numrit të përgjithshëm të votuesve të regjistruar, ndërsa numri i fletëvotimeve të papërdorura ishte 7.428.
Nga numri i përgjithshëm i votuesve, 8.626 fletëvotime ishin të vlefshme, ndërsa 202 fletëvotime ishin të pavlefshme.
Bazuar në votat e mbledhura për kandidatët, Arkin Jahiji nga Aleanca Kombëtare për Integrim – AKI mori 4.442 vota, ndërsa Stojanço Radiçevski nga Koalicioni “Maqedonia Jote”, i udhëhequr nga OBRM-PDUKM-ja, mori 4.184 vota.
Me shpalljen e rezultateve fillestare, fillojnë të rrjedhin afatet ligjore për parashtrimin e kundërshtimeve.
Në përputhje me nenin 148 paragrafi (2) të Kodit Zgjedhor, Komisioni Shtetëror i Zgjedhjeve informon se kundërshtimi ndaj procedurës së votimit parashtrohet brenda 48 orëve pas përfundimit të votimit, më së voni deri më 03.11.2026 (e martë), deri në orën 19:00.
Ndërsa, kundërshtimi ndaj procedurës së mbledhjes dhe verifikimit të rezultateve parashtrohet brenda 48 orëve nga shpallja e rezultateve fillestare, deri më 04.11.2026 (e mërkurë), deri në orën 15:30.
Konkluzioni për verifikimin dhe shpalljen e rezultateve fillestare të votimit në rrethin e dytë për zgjedhjen e kryetarit të Komunës së Bërvenicës do të publikohet në faqen zyrtare të internetit të Komisionit Shtetëror të Zgjedhjeve.
