Raportuesi për Maqedoninë e Veriut, Thomas Waitz, para Komitetit të Punëve të Jashtme (AFET) të Parlamentit Evropian, ku u prezantua pakoja e zgjerimit, bëri thirrje për përpjekje diplomatike nga Komisionerja Evropiane Marta Kos për të zgjidhur çështjet mes Maqedonisë së Veriut dhe Bullgarisë. “Dua të theksoj në një kuptim pozitiv se si Kroacia dhe Mali i Zi po merren me çështjet dypalëshe.
Dua të falënderoj Kryeministrin Plenkoviç dhe Kryeministrin Spajiç që biseduan me njëri-tjetrin, që u ulën në të njëjtën tryezë dhe që gjetën zgjidhje për çështjet dypalëshe.
Sepse çështjet dypalëshe nuk duhet të pengojnë në asnjë mënyrë përparimin në procesin e pranimit, dhe pikërisht kështu duhet të bëhet”, theksoi Waitz.
Ai shtoi se, “unë besoj se ky është gjithashtu një shembull i shkëlqyer se si çështjet dypalëshe që kërkojnë dialog mund të trajtohen në vende të tjera, siç është Maqedonia e Veriut”.
Waitz theksoi se “disa nga çështjet dypalëshe tani janë në nivel evropian, bëhet fjalë për përfshirjen e pakicave, dhe në këtë drejtim, duhet të zbatohen ndryshimet kushtetuese.
Por, e përsëris, e vetmja rrugëdalje nga ky bllokim është që palët të flasin me njëra-tjetrën, domethënë që qeveritë e Bullgarisë dhe Maqedonisë së Veriut të ulen dhe të flasin.
Dhe meqenëse e dimë që motivimi nuk është gjithmonë në nivelin më të lartë, ju kërkoj juve, Komisioner, të bëni përpjekje në këtë drejtim diplomatik”, i tha Waitz Kos.
Më parë, Kos prezantoi pakon e zgjerimit të vitit 2026, e cila përmban raportet e KE-së për dhjetë vendet kandidate për anëtarësim në BE dhe theksoi se çdo vend kandidat mund t’i bashkohet grupit të vendeve që po përparojnë me shpejtësi dhe se BE i inkurajon të gjithë kandidatët të bëjnë këtë zgjedhje.
