Dje, dy persona janë gjetur të vdekur në afërsi të vendit të quajtur “Içeva Çeshma”, në Gorno Sellë, në Bogdanci.
Njëri nga ta është gjetur pranë një veture të djegur, ndërsa trupi i personit tjetër është zbuluar brenda automjetit, sipas njoftimit nga Ministria e Punëve të Brendshme.
Rasti është raportuar në orën 18:40, kur T.K. nga Bogdanci njoftoi policinë për një veturë të parkuar që ishte përfshirë nga zjarri, si dhe për një trup të pajetë pranë saj.
Policët e Stacionit Policor të Gjevgjelisë kanë shkuar menjëherë në vendin e ngjarjes, ku kanë konstatuar se pranë automjetit të djegur ndodhej 21-vjeçari V.G. nga Bogdanci, i cili nuk jepte shenja jete.
Ekipi i Ndihmës së Shpejtë nga Spitali i Përgjithshëm në Gjevgjeli ka konfirmuar vdekjen e tij.
Pas arritjes së ekipit të zjarrfikësve dhe lokalizimit të zjarrit, brenda veturës është gjetur edhe një trup tjetër i pajetë.
Për rastin është njoftuar prokurori publik nga Prokuroria Themelore Publike në Gjevgjeli.
Pas përfundimit të këqyrjes së vendit të ngjarjes, trupat janë dërguar për obduksion.
Deri më tani nuk janë zbuluar shkaqet e zjarrit, rrethanat në të cilat kanë humbur jetën dy personat, as nëse ka ndonjë lidhje mes tyre.
Nga MPB bëjnë të ditur se po merren masa për zbardhjen e plotë të rastit.
