Nënë e bir, që janë përkatësisht gruaja dhe djali i viktimës Urim Fiku, kanë mohuar në gjykatë se kanë ndonjë lidhje me vdekjen e 61-vjeçarit.
Ngjarja ka ndodhur më 03 nëntor në fshatin Godvi në Bulqizë.
Fillimisht, ishte raportuar se Urim Fiku ishte sulmuar nga një ari, por ekspertiza mjeko-ligjore zbuloi një plagë të shkaktuar nga arma e zjarrit në trupin e tij.
Sipas raportimeve, në gjykatë, nënë e bir kanë dëshmuar se 61-vjeçari kishte ardhur në shtëpi i gjakosur, pasi ishte dëmtuar dhe i shpërfytyruar nga ari.
Pas kësaj, ai kishte hyrë në banesë, kishte marrë pistoletën dhe kishte qëlluar veten në gjoks.
E gjithë kjo ka bërë që gruaja të njoftojë ambulancën.
I biri i viktimës ka deklaruar se gjatë ngjarjes ka qenë në punë dhe nuk ndodhej në shtëpi.
Ata pretendojnë se Urim Fiku kishte vendosur leqe për të kapur kafshë të egra (derra) në pyll.
Aktet e ekspertimit të mjekësisë ligjore, që pritet të vijnë nga policia shkencore, do të hedhin dritë mbi këtë ngjarje.
Në përfundim të seancës, gjykata vendosi arrest me burg për të dy.
