Prokuroria Themelore në Pejë ka bërë një tjetër reagim në lidhje me vrasjen e Arlinda Zekajt në Vitomiricë, duke ofruar informacione të reja rreth veprimeve që janë ndërmarrë pas kërkesës së saj për ndihmë dhe trajtimin e rasteve të mëparshme.
Në një njoftim të publikuar të hënën, Prokuroria ka bërë të ditur se Kryeprokurorja Lumturije Vuçetaj, pas pranimit të një kërkese nga Zekaj më 22 tetor, e kishte adresuar çështjen te institucionet përkatëse dhe kishte iniciuar hetimin për pretendimet e veprimeve ose mosveprimeve të mundshme nga ana e zyrtarëve. “Pas pranimit të kërkesës, Kryeprokurorja ka vlerësuar rrethanat e paraqitura dhe e ka adresuar çështjen te institucionet përkatëse”, thuhet në njoftim.
Sipas Prokurorisë, kërkesa u kishte shkuar Policisë së Kosovës, Gjykatës Themelore në Pejë, Drejtorisë për Punë dhe Mirëqenie Sociale, Qendrës për Punë Sociale dhe Zyrës për Mbrojtje dhe Ndihmë Viktimave, me kërkesë për vlerësim urgjent të situatës dhe ndërmarrjen e veprimeve brenda kompetencave të tyre.
Prokuroria ka njoftuar se më 16 tetor, Gjykata kishte nxjerrë një vendim që e urdhëronte ish-bashkëshortin e Zekajt të lejonte kthimin e saj në shtëpinë e përbashkët.
Po ashtu, ishte lëshuar një urdhër mbrojtjeje për një periudhë prej gjashtë muajsh.
Më 22 tetor, kur Zekaj kishte kërkuar zbatimin e këtij vendimi, Policia e kishte njoftuar prokurorin kujdestar për rastin.
Pas një vlerësimi të rrezikut, prokurori kishte konstatuar se kthimi i menjëhershëm në shtëpi mund të rrezikonte jetën dhe sigurinë e saj. “Me qëllim të mbrojtjes së saj, prokurori kishte kontaktuar familjarët e viktimës, përkatësisht vëllezërit e saj”, njofton Prokuroria.
Zekaj kishte pranuar të shkonte te familjarët, por kishte kërkuar që të nesërmen të shoqërohej nga Policia për t’u kthyer në shtëpinë e përbashkët.
Një patrullë policore ishte paraparë të qëndronte në afërsi gjatë kthimit të saj.
Sidoqoftë, pak minuta pas kthimit në shtëpi, u raportua për vrasjen e saj.
Sipas kronologjisë së Prokurorisë, më 25 tetor, në orën 19:48, Policia kishte kontaktuar prokurorin kujdestar për një rast të dyshuar të dhunës në familje në shtëpinë e Zekajt.
Në stacionin policor ishin shoqëruar Zekaj dhe ish-bashkëshorti i saj, J.S., i cili ishte ndaluar për 48 orë.
Gjatë trajtimit të rastit, viktimës iu ofrua mundësia për t’u strehuar, por ajo refuzoi dhe kërkoi të kthehej në shtëpinë e përbashkët, ku ndodhej djali i saj dhe pasuria e saj. “Pas kësaj, viktima ishte shoqëruar nga një patrullë policore për në shtëpi, rreth orës 21:00”, thuhet në njoftim.
Prokuroria informon se pak minuta pas kthimit të saj, prokurori kujdestar është njoftuar se Zekaj ishte sulmuar me një mjet të fortë brenda shtëpisë nga kunati i saj, A.S., i dyshuar për këtë rast.
Policia e Kosovës është duke ndërmarrë veprime për lokalizimin dhe arrestimin e të dyshuarit, i cili ende nuk është arrestuar.
Gjithashtu, më 23 tetor, Prokuroria kishte ngritur aktakuzë ndaj ish-bashkëshortit të viktimës, J.S. për veprën penale të kanosjes në kuadër të marrëdhënies familjare.
Në lidhje me pretendimet e paraqitura në kërkesën e saj, Prokuroria thekson se është iniciuar një rast për të vlerësuar nëse veprimet ose mosveprimet e personave zyrtarë përmbushin elementet e veprës penale të keqpërdorimit të pozitës apo autoritetit zyrtar.
Prokuroria Themelore në Pejë shpreh keqardhje për vrasjen dhe thekson nevojën për zbardhjen e plotë të rastit.
