Kryeministri i Kosovës, Albin Kurti, e ka vlerësuar si historik rezultatin e Koalicionit Shqiptar në Luginën e Preshevës, i cili arriti të sigurojë dy mandate në zgjedhjet parlamentare në Serbi, të zhvilluara më 25 tetor.
Gjatë mbledhjes së Qeverisë së Kosovës, Kurti tha se koalicioni mori 27 mijë e 670 vota, duke e quajtur këtë si rezultatin më të lartë të shqiptarëve që nga viti 2000. “Në këto zgjedhje pati disa arritje historike.
Koalicioni shqiptar mori 27 mijë e 670 vota.
Ky është rezultati më i lartë i shqiptarëve që nga viti 2000.
Plot 1 233 vota më shumë sesa në vitin 2020, kur u fituan tri mandate.
Me rritjen e 35 koeficientëve zgjedhorë për pakicat kombëtare, ky rezultat ka ekuivalentin përllogaritës të 37 mijë e 353 votave.
Shqiptarët janë pakica e katërt për nga popullsia në Serbi, por janë renditur të dytët për nga votat dhe të parët për nga mandatet së bashku me hungarezët,” theksoi Kurti.
Ai gjithashtu komentoi fitoren e Listës së Studentëve në Serbi dhe humbjen e ish-presidentit serb Aleksandar Vuçiq, si dhe mbetjen jashtë Kuvendit të listës së Ivica Daçiqit.
Kryeministri Kurti interpretoi këto rezultate si humbje politike për Vuçiqin dhe Daçiqin, duke i lidhur me zhvillimet politike të një çerek shekulli më parë, kur nga pushteti u larguan Slobodan Millosheviqi dhe Vojislav Shesheli.
Fitorja e Listës së Studentëve në Serbi dhe humbja e Vuçiqit, ky është komenti i Kurtit: “Lista Studentore doli e para.
Koalicioni i Vuçiqit e humbi shumicën parlamentare, ndërsa lista e Daçiqit mbeti jashtë Kuvendit.
Një çerek shekulli pas humbjes së Millosheviqit dhe Sheshelit, edhe pasardhësit e tyre politikë, Vuçiqi dhe Daçiqi, humbën,” përfundoi ai.
