Trupi i pajetë i një 31-vjeçari është zbuluar në një pus rreth 10 metra të thellë në zonën e Felloniche, e cila ndodhet në territorin e komunës Longiano, në provincën Forlì-Cesena të Italisë.
Prokuroria e Forlì-t ka nisur hetimet për vrasje, ndërsa një nga pistat kryesore është ajo e ekzekutimit me armë zjarri.
Sipas mediave italiane, viktima dyshohet se është një 31-vjeçar shqiptar, i identifikuar si Denaldo Maxhallakui, i cili ishte raportuar i zhdukur prej disa javësh, por identiteti i tij ende nuk është konfirmuar zyrtarisht.
Trupi u gjet paraditen e së mërkurës, më 28 tetor, rreth orës 10:00, në një pus pranë një banese fshati, përgjatë rrugës provinciale 85, që lidh Savignano sul Rubicone me zonën e Felloniche.
Sipas raportimeve të mediave italiane, pranë pusit janë gjetur disa gëzhoja pistolete, të cilat po shqyrtohen nga hetuesit për të përcaktuar nëse kanë lidhje me ngjarjen.
Dyshimet për identitetin e viktimës janë forcuar për shkak të zhdukjes së 31-vjeçarit shqiptar, i cili frekuentonte zonën ku u gjet trupi.
Rreth tri javë më parë, makina e tij ishte gjetur e djegur plotësisht, disa kilometra larg, përgjatë rrugës Fondovalle del Rubicone.
Zbulimi i trupit erdhi pas verifikimeve në pus, ku dyshohej se mund të kishte diçka brenda.
Sipas rindërtimit paraprak të ngjarjes nga mediat italiane, hedhja e një guri në pus dhe mungesa e zhurmës së zakonshme të kontaktit me ujin ngritën dyshime, duke nxitur kontrolle më të hollësishme.
Në vendngjarje mbërritën karabinierët e Cesenatico-s, një njësi e specializuar me qen kërkimi nga Firence, zjarrfikësit dhe mjeku ligjor.
Operacioni i nxjerrjes së trupit u realizua nga ekipe të specializuara për ndërhyrje në puse dhe zona të vështira.
Hetimet po drejtohen nga Prokuroria e Forlì-t, në bashkëpunim me karabinierët.
Autoritetet janë duke punuar për të konfirmuar identitetin e viktimës, për të përcaktuar shkaqet dhe rrethanat e vdekjes, si dhe për të zbardhur lidhjen e mundshme mes zhdukjes së shqiptarit, makinës së djegur dhe trupit të gjetur në pus.
Deri në këtë fazë, rrethanat e plota të ngjarjes mbeten të paqarta dhe hetimet vazhdojnë.
