Prokurorja Iskra Haxhi Vasileva është shpallur fituese në garën për drejtimin e Prokurorisë Themelore Publike për Ndjekjen e Krimit të Organizuar dhe Korrupsionit, duke marrë më së shumti vota.
Ajo ka një epërsi të ngushtë ndaj kandidatit të dytë, Trajçe Pelivanov.
Gara për këtë post kishte pesë kandidatë: Iskra Haxhi Vasileva, Faton Azizi, Trajçe Pelivanov, Jovan Cvetanovski dhe Lidija Raiçeviq.
Votimi ka nisur nga ora 08:00 dhe ka zgjatur deri në orën 16:00.
Të drejtë vote kishin 187 prokurorë publikë nga e gjithë Maqedonia e Veriut, të cilët votuan në mënyrë direkte dhe të fshehtë.
Rezultatet pritet të përmblidhen dhe të shpallen zyrtarisht në një seancë publike.
Të gjithë kandidatët dhe votuesit kanë të drejtë të paraqesin kundërshtime në lidhje me procedurën zgjedhore.
Zgjedhjet u organizuan për shkak të përfundimit të mandatit të drejtuesit aktual, Islam Abazi, i cili u zgjodh në vitin 2022 dhe nuk u rikandidua për një mandat të ri.
